И оваа година, студентите и наставничкиот кадар од Факултетот за медицински науки при Универзитетот „Гоце Делчев“ – Штип успешно реализираа практична настава во реномираната фармацевтска компанија „Алкалоид“ АД Скопје.
Во рамките на тридневната посета, студентите имаа можност да се запознаат со работата на Институтот за истражување и развој, како и со лабораториите за контрола на квалитет. Преку директна интеракција со експерти од областа, студентите го поврзаа своето теоретско знаење со практичните процеси во современото фармацевтско производство.
Од „Алкалоид“ посочуваат дека соработката со академската заедница е од особено значење, а задоволството од посетата било заемно – особено поради ангажираноста, љубопитноста и желбата за учење што ја покажале студентите на УГД.
Наставниците и менторите од компанијата, со голем професионализам и ентузијазам, ги споделија своите знаења и искуства, со цел да ја инспирираат и поддржат следната генерација фармацевти.
Соработките од ваков тип се важен чекор во подготвувањето на младите кадри за професионалните предизвици во индустријата, а УГД и понатаму ќе продолжи да гради мостови меѓу образованието и практичната работа.
