Студентите од Факултетот за медицински науки на УГД и годинава успешно го организираат Интернационалниот конгрес на студенти по општа медицина.

Ова е четврто издание на овој Конгрес, кое потврдува дека на Факултетот за медицински науки има создадено одлично јадро на проактивни студенти кои успешно организираат настани на кои се презентираат и највисоки медицински достигнувања.

- Навистина ми е чест и задоволство, бидејќи ова е настан кој студентите сами го организираат, еве веќе по четврти пат, и ова е еден настан кој ги обединува сите студенти од општа медицина, сите генерации, и во кој ентузијазмот, идеите и знаењето на студентите доаѓа до израз – изјави проф. д-р Марија Дарковска-Серафимовска, продеканка за настава на ФМН.

Доц. д-р Марија Димитровска-Иванова, претседателка на Научниот одбор, рече дека е задоволна од квалитетот и бројот на пристигнатите апстракти оваа година.

- Како Научен одбор се потрудивме да ја задржиме академската строгост и да го поттикнеме ентузијазмот на студентите. Добивме апстракти од повеќе области на клиничката медицина, но исто така и од базична медицина. Имаме повеќе од 100 апстракти кои се поднесени како усни и постер презентации и повеќе од 600 пасивни учесници од повеќе земји од регионот и од Европа.  Овој Интернационален конгрес има големо значење во афирмирање на нашиот факултет и на Универзитетот „Гоце Делчев“, и можност за остварување на соработка со други медицински факултети од земјата, регионот и Европа.

Во однос на предавањата, доц. д-р Димитровска рече дека ќе има од повеќе области, како од клиничка медицина, така и од базичните медицински науки, гинекологија, ортопедија, хирургија, педијатрија, генетика и онкологија.

Ангела Радева, студентка на ФМН, изјави дека слоганот на Конгресот е Виамедика и претставува платформа за размена на многу знаења, идеи и научни достигнувања помеѓу младите идни лекари.

- Овој Конгрес е и доказ за афирмацијата на нашиот Универзитет, како и за Факултетот за медицински науки. Од име на студентите, сакам да им се заблагодарам на сите кои придонесоа да овој наш сон стане реалност – потенцираше Ангела Радева.

Конгресот се одржува три дена, од 15 до 17 мај, во Мултимедијалниот центар на УГД.