На 13 и 14 мај (понеделник и вторник) ќе се одржи Студентска крводарителска акција во просториите на Кампус 2 – бифе, со почеток од 9 до 14 часот.

Ги покануваме сите студенти, професори, асистенти да ја поддржат оваа благородна мисија и да даруваат крв.

Еве неколку причини зошто да дарувате крв.

Крвта е лек за којшто нема соодветна замена. Секому од нас некогаш во животот може да ни биде потребна терапија со крв и крвни компоненти.

Информации за чинот на дарување.

• Дали треба да бидам сит пред дарувањето?

- Пред дарувањето пожелно е да јадете лесен оброк (кифла, ѓеврек…).

• Во што се состои прегледот пред дарувањето?

- Пополнувате прашалник за дарител на крв во кој прашањата се однесуваат за вашето здравје, прележани болести и животни навики. Со боцкање од прст се зема капка крв и се проверува нивото на хемоглобинот во крвта. Потоа следи разговор со лекарот кој ќе ви мери крвен притисок и ја слуша работата на срцето.

• Дали се тестира крвта?

- Да. Крвта се испитува за присуство на заразни заболувања преносливи со крв – жолтица Б и Ц, сифилис, сида. Секоја единица на крв која била позитивна на кој било од овие тестови безбедно се уништува. Освен ова се одредува крвна група, Rh фактор и антитела кај секоја единица крв.

• Колку долго трае дарувањето крв?

- Дарувањето трае околу 5 – 10 минути.

Редовното дарување крв е поврзано со намален ризик од кардиоваскуларни болести, како што се срцеви напади и мозочни удари, со подобрување на протокот на крв и намалување на нивоа на железо во организмот.

Пред и по дарување зголемете го внесувањето на течности, пред сѐ вода и безалкохолни пијалаци.

„Дарувајте крв ако сакате да играте значајна улога во општеството.“

„Човек кој спасува еден живот го спасува целото човештво.”